De Biazi vendos, ja zëvendëstrajneri i ri i kombëtares

Largimi i Paolo Tramezzani nga stafi drejtues i kombëtares shqiptare ka krijuar një boshllëk për De Biazin, i cili duket se do të vijojë t’ia besojë rolin e “krahut të djathtë” sërish një italiani, bashkombasi të vet.

Gazetari i njohur sportive italian i “Sky Sport” ka zbuluar në portalin e vet emrin e zv.trajnerit të ri të kuqezinjve.

Bëhet fjalë për Marco Veronese: “Një aventurë emocionuese në stolin e Shqipërisë është kurorëzuar me kualifikimin për në finalet e “Euro 2016”, derisa rrugët e Xhani De Biazit dhe zëvendësit të tij, Paolo Tramezzani, janë ndarë.

Vendi i ndihmëstrajnerit ka mbetur vakant pas largimit të ish-mbrojtësit për të trajnuar i vetëm Luganon.

Dhe zëvendësuesi është gjetur sot: ai është Marco Veronese, ish-sulmuesi i datëlindjes së vitit 1976, një ish-lojtar i De Biazit te Modena, ekip me të cilën ai ishte protagonist i promovimit të dyfishtë nga Seria C1 në periudhën 2000-2002.”

I njëjti burim informacioni, që njoftoi i pari edhe largimin e Tramezzani te Lugano, bën me dije se Veronese ka pasur përvojë si trajner i Pavi, zëvendëstrajner te Fulvio në “Pro Lega”, te Monza dhe Cremonese.