Dëmtohet serbi, Hysaj titullar në duelin ndaj Crvena Zvezdës

Elseid Hysaj pritet të jetë në fushë ditën e mërkurë ndaj ekipit serb të Crvena Zvezdës, pavarësisht kritikave të shumta që ka marrë në javët e fundit.

Dëmtimi i mbrojtësit serb Nikola Maksimovic i ka hapur rrugë mbrojtësit të Kombëtares së Shqipërisë për të zënë vend në formacionin titullar për ndeshjen e pestë të Champions League.

Hysaj në këtë sezon është spostuar sa në krahun e majtë në të djathtë të mbrojtjes napolitane duke iu përshtatur ideve të teknikut të tij Carlo Ancelotti. Ndaj rivalëve serbë Hysaj do të ketë në memorie kujtimet e tetorit të 2014 kur u ndërpre ndeshja Serbi-Shqipëri në Beograd, e cila përfundoi në rrëmujë dhe me penalizimin e Kombëtares Serbe me 3 pikë në garën për kualifikim në kampionatin europian të 2016.