Dy legjendat e Romës futen “mik” për Panuccin te Roma

Trajneri i kombëtares sonë, Christian Panucci shumë shpejt mund të marrë drejtimin e Romës. Strategu italian shpreson që skuadra e Romës të humbasë sot në shtëpi kundër Sassuolos. Në rast se ndodh diçka e tillë, atëherë me shumë mundësi trajneri Eusebio Di Francesco do të pushohet nga skuadra.

Ky i fundit po vuan shumë, pasi sezoni ka nisur keq dhe ekipi po bën gabime skandaloze në mbrojtje. Drejtuesit kanë humbur durimin dhe po punojnë për emrin e ri që mund t’i besohet drejtimi. Francesco Totti dhe Daniele De Rossi kanë shprehur pëlqimin e tyre për Christian Panucci dhe u kanë kërkuar drejtuesve të nisin kontaktet me numrin një të stolit të Shqipërisë.

Panucci ka lënë shumë mbresa në kryeqytetin italian, pasi ka luajtur me fanellën e Romës nga viti 2001 deri në vitin 2009 duke koleksionuar 226 ndeshje dhe 21 gola.