Dy yjet e Anglisë tërhiqen në mënyrë të papritur nga kombëtarja

Jamie Vardy ka vendosur që të mos luajë më për Anglinë, , pasi kërkon të kalojë më shumë kohë me familjen e tij. Lajmin e ka bërë të ditur sot vetë futbollisti, i cili tha se tashmë kërkon të kalojë më shumë kohë me familjen dhe ka njoftuar trajnerin Southgate për vendimin e tij.

Vardy shpërtheu shumë vonë si sulmues dhe iu bashkua përfaqësueses angleze vetëm në vitin 2015, ndërsa që prej asaj kohe ka luajtur 26 takime dhe ka shënuar 7 gola. Në kampionatin botëror “Rusi 2018”, Vardy ishte prezent, por në shumicën e rasteve u nis nga stoli, pasi kishte përpara një dyshe sulmuese si Raheem Sterling dhe Harry Kane.

Në të njëjtën ditë me Vardy-n, vendosi t’i japë lamtumirën përfaqësueses së “Tre luanëve” edhe mbrojtësi i Chelseat, Gary Cahill, i cili në moshën 32-vjeçare, tha se e shikonte si momentin ideal për t’u larguar nga Anglia.

“Kam luajtur mbi 60 takime me skuadrën përfaqësuese dhe disa herë kam mbajtur edhe shiritin e kapitenit, gjë që më ka mbushur me krenari. Tani mendoj se është koha për të bërë një hap pas dhe vendimin tim ia kam komunikuar edhe trajnerit Southgate”, deklaroi Cahill.