Ekipi i basketbollit të Vllaznisë me president dhe trajner të ri

E nisi keq sezonin dhe nga ekip kampion, Vllaznia e basketbollit u zhyt në krizë me 6 ndeshje të luajtura dhe të gjitha të humbura.

Atëherë kur u duk se nuk ka dritë në fund të tunelit, shkodranët u bënë me president të ri Alban Xhaferrin, e bashkë me të edhe me trajner.

Zyrtarisht kroati Neven Plantak është trajneri i ri i Vllaznisë në basketboll për meshkuj dhe prezantimi i tij u bë mbrëmjen e së hënës në pallatin e sportit “Qazim Dervishi”. Krah tij, skuadrës i janë bashkuar edhe tre bashketbollistë të huaj.

Bëhet fjalë për Michael Hundley, Austin Dasent dhe Malik Carter. Ish- basketbollisti i njohur Altin Halili, i cili ka marrë postin e drejtorit teknik, shprehet optimist për ecurinë në javët e ardhshme, duke shpresuar që Vllaznia do dalë sa më shpejt nga kriza ku ndodhet.

Tre basketbollistët vijnë për herë të parë në Shqipëri. Hundley luan në pozicionin 4 dhe 5 dhe është 2.06 m i gjatë, Austin Dasent luan në poziconet 2 dhe 3 ndërsa Malik Carter luan në pozicionet 1 dhe 2.

Drejtuesit e klubit kanë në plan të bëjnë edhe rikthime në radhët e ekipit, si Ervin Bërdicën e Herion Fasline, dy basketbollistë shkodranë që luajnë në skuadra të tjera.

Fillimisht synohet mbijetesa në Superligë e më pas mundësia për të siguruar katërshen dhe dueluar për titull, ashtu siç ka bërë për vite me radhë.