Entuziazëm për Championsin, tifozët e Interit blejnë mbi 60 mijë bileta

Rikthimi pas 6 sezonesh në Champions League, ka sjellë jo pak entuziazëm tek tifozët e Interit. Ekipi milanez do ta fillojë aventurën në kompeticionin më madhor evropian kundër Tottenham, më 18 shtator, e që tani janë shitur 60 mijë bileta.

Sigurisht, numri pritet të jetë më i madh, ku synohet të arrihet shpejt numri i 70 mijë biletave të shitura, ose në rastin më të mirë, San Siro të jetë i mbushur me ngjyrat zikaltër.

Duke parë interesin e madh që në ndeshjen e parë, pritet që të ketë interesim të madh edhe për ndeshjet kundër Barcelonës, që do të jetë më 6 nëntor, por dhe atë kundër PSV Eindhoven më 11 dhjetor. Pavarësisht nisjes aspak të mirë në kampionat me vetëm 4 pikë, tifozët kanë vendosur për të mos ta braktisur ekipin në këtë sezon të gjatë.