Ferdinand: Ronaldo ndonjëherë zemërohet dhe fillon të kafshojë gjërat

Cristiano Ronaldo nuk mundi që të linte gjurmë në debutimin me Juventusin në Champions, duke u ndëshkuar me karton të kuq pas 29 minutash. Rio Ferdinand, ish-shok skuadre i portugezit te Manchester United, nuk ka qenë i qartë për arsyen e kartonit të kuq, por nuk është befasuar nga përjashtimi i yllit të Juventus nga fusha e lojës.

“Kartoni i kuq më duket i ekzagjeruar dhe besoj se skualifikimi mund të apelohet”, ka thënë ish-mbrojtësi i “Djajve të Kuq”.

Gjithsesi, një reagim i tillë ndaj një provokimi nuk mund të përjashtohet kur bëhet fjalë për Cristiano Ronaldo-n, i cili nuk i ka për herë të parë këto shpërthime.

“Cristiano mund të jetë shumë i paparashikueshëm. E kupton kur luan me të dhe ndan dhomat e zhveshjes me të. Ndonjëherë zemërohet dhe fillon të kafshojë gjërat”, ka thënë ai.