Flamurtari-Skënderbeu, sot beteja për kreun

Sfida Flamurtari-Skënderbeu, që do të luhet mbrëmjen e së hënës, do të mbyllë kuadrin e javës së katërt të Kategorisë Superiore.

Për trajnerin Ilir Daja, që do të luajë kundër ish-skuadrës së tij, deklaroi se Skëndërbeu vjen si favorit. “Skënderbeu është favorit, pasi është kampioni. Ka ekip të konsoliduar. Do ta vlerësojmë maksimalisht ndeshjen, por më shumë do të respektojmë veten tonë, pasi kemi plusin e mbështetjes së publikut tonë. Dëshira për të fituar do të jetë maksimale, por nuk do të humbim logjikën e lojës”, u shpreh Daja.

Ndërsa për Orges Shehin, kjo përballje është e veçantë pasi do të jetë kundër Dajës, i cili deri përpara pak muajsh e stërviste në radhët e kampionëve të Shqipërisë.

“Është përballje mes rivalësh, për vetë faktin që kemi të njëjtat pikë. Mendoj që është e fortë, mund ta quaj miniderbi. Është e veçantë pasi vjen shumë shpejt dhe për faktin se Daja ishte trajneri ynë përpara pak muajsh”, u shpreh Shehi.