Goditi tifozin me shkelm, Marseille pezullon mbrojtësin Evra por nis hetimet edhe ndaj tifozëve

Klubi francez i Marseille ka pezulluar pa afat mbrojtësin Patrice Evra-n. Pas incidentit të ndodhur para takimit kundër Guimares në “Europa League”, klubi francez ka dalë me një deklaratë për mediat ku komunikon largimin e 36-vjeçarit nga ekipi.

Evra goditi me shkelm një tifoz të Marseille, ndërkohë që ekipi ishte duke bërë nxemjen para sfidës për grupet e Europa League. Reagimi i mbrojtësit francez erdhi pas ofendimit që një prej tifozëve i bëri Evra-s.

Klubi i Marseille njoftoi se presidenti i klubit pati një takim me Patrice Evra dhe i komunikoi futbollistit pezullimin e tij me efekt të menjëhershëm dhe thirrjen në një takim të dytë përpara një sanksioni të mundshëm disiplinor.

Deklarata e klubit të Marseille:
“Rezultatet e para të hetimit të brendshëm të udhëhequr nga klubi zbulojnë një sjellje të papranueshme nga një pjesë e vogël e provokatorëve që sollën sulme të rënda urrejtje ndaj Evra-s.
Si një lojtar profesionist dhe me përvojë, Patrice Evra nuk mund të reagonte në një mënyrë aq të papërshtatshme. Klubi po vazhdon hetimet dhe do të përdorë të gjitha mjetet ligjore në dispozicion të tij kundër individëve që nën maskën e pasionit të tyre për Marseille, hyjnë në fushë dhe fyejnë një lojtar, në vend që ta mbështesin atë”.