Humbja 5-0 ndaj Laçit, Teuta merr vendimin për fatin e Shkëmbit

Teuta ka vendosur që t’i japë sërish besim trajnerit Bledi Shkëmbi. Humbja e thellë 5-0 në transfertën e Laçit, lëkundi teknikun korçar, që menjëherë pas ndeshjes la të kuptohej se do të rishikonte qëndrimin e tij. Por opsioni i largimit të trajnerit nuk është pjesë e planeve të klubit durrsak. Për këtë arsye, Shkëmbi do të vazhdojë punën në drejtim të Teutës, e cila objektiv kryesor në këtë sezon ka sigurimin e një bilete për në Kupat e Europës.

Ky është një sinjal shumë i rëndësishëm për skuadrën, e cila duhet të reagojë menjëherë për të mos e “minuar” misionin e saj në garën që në fazën e fundit të këtij sezonit të Superligës do të jetë me të vërtetë shumë e fortë. Teuta është në vendin e tretë të renditjes me dy pikë më shumë se ndjekësit më të afërt të Laçit, ndërsa në sfidën e ardhshme do të luajë të mërkurën në transfertën kundër Flamurtarit.