Hysaj kërkoi dyfishim të pagës, bllokohet rinovimi me Napolin

Rinovimi i Elseid Hysajt me Napolin mund të bllokohet. Rroga e tij aktuale është shumë e vogël, pasi ai është i 12-i në listën e më të paguarve në klub ndonëse është titullar i paprekshëm dhe kjo shifër rrezikon të mos lëvizë deri në mbyllje të marrëveshjes së tij ekzistuese me klubin.

Shkak janë bërë kërkesat e tepruara të menaxherit të Hysajt, Mario Giufredi, në ditët e para të negociatave me klubin e Napolit rreth rinovimit të mundshëm të akordit me palëve. Sipas “RAI Sport”, Giufredi ka filluar menjëherë me kërkesa shumë të larta financiare, duke marrë shkas nga një ofertë që i kishte mbërritur futbollistit në verë.

Chelsea ofronte një rrogë prej 4 milionë eurosh futbollistit shqiptar, ndaj për rinovimin e kontratës që mbaron pas 3 vitesh, Giufredi ka kërkuar një shifër fillestare prej 3 milionë eurosh në vit. Por kjo ka bërë që Napoli të mbyllë menjëherë diskutimin, pasi nuk mendon t’i ofrojë lojtarit një rrogë aq të lartë, duke llogaritur se për momentin ai përfiton 1.6 milionë euro në vit.