Igli Tare: Kemi refuzuar 70 milionë euro për Milinkovic-Saviç!

Drejtori sportiv i Lazio, Igli Tare ka dhënë një intervistë për “Mediaset Premium” ku ka folur edhe për zërat e merkatos në lidhje me Milinkovic-Saviç.

“Do të më pëlqente t’ju përgjigjesha në fund të sezonit, sepse tani ka rëndësi vetëm ajo që ndodh në fushën e lojës dhe kjo skuadër është e ndërtuar për të arritur diçka të rëndësishme. A vlen 70 milionë euro? E kemi refuzuar këtë shifër kur na u ofrua. Lacio duhet të jetë një pikë mbërritje dhe jo trampolinë. Nëse dikush largohet, atëherë do të marrim dikë edhe më të aftë.

Objektivat tanë? Të fitojmë Kupën e Italisë, Europa League dhe të arrijmë në Champions League. Do të luftojmë në të gjitha frontet për të mirën e Lacio dhe të futbollit italian, por nëse më duhet të zgjedh objektivi kryesor është të arrijmë në Champions League për sezonin e ardhshëm”, u shpreh Tare.