Klubi i njohur suedez i shet abonimin e përjetshëm tifozit të skuadrës

AIK i Stockholmit, një nga klubet më prestigjoze të futbollit suedez po bën xhiron e botës për një abonim të shitur për të parë të gjitha ndeshjet sezonale që verdhezinjtë do të zhvillojnë në shtëpi. E veçanta në këtë histori se abonimi i fundit që ka bërë një tifoz i AIK është i përjetshëm.

E ka blerë një tifoz 43-vjeçar për shumën rekord të 189 mijë koronash suedeze që të konvertuara në euro janë rreth 18 mijë e 500 euro. I kontaktuar nga mediat tifozi në fjalë i quajtur Magnus Kack është shfaqur i bindur dhe shumë i lumtur për zgjedhjen e tij.

“Kur mësova për inciativën e kisha blerë abonimin për sezonin e ardhshëm, por nuk kisha asnjë dyshim. Ndoshta pas 30 vitesh do të jem në pension dhe do të kem sërish të njëjtin abonim dhe nuk do të mbetem kurrë pa biletë”, theksoi tifozi që tashmë është pajisur me të ashtuquajturën “Eternity Card”.