“Kupa vjen në Durrës”

Teuta shndërrohet kur luan me ekipe të madha dhe sot kundër Kukësit do të futet në fushë me qëllimin e vetëm për ta fituar ndeshjen.

Barazim 2-2 në ndeshjen e parë favorizon ekipin e Ndreut, por në kampin durrsak ka optimizëm. Në një intervistë për RTV ORA, mbrojtësi Ditmar Bicaj nuk e diskuton kualifikimin në gjysmëfinale të Kupës së Shqipërisë.

Ditmar Bicaj: “Në fund të ndeshjes ishim të gëzuar se realizuam dy gola në 5 minuta, kur e kishim menduar të humbur takimin. Kjo do të thotë se i kemi dhënë edhe një shans vetes. Në ndeshje futemi me besimin për të kaluar në gjysmë finale. Kukësi është një kundërshtari i fortë por është një kundërshtar që të lë të shprehesh. Ka një ekip të mirë, nuk është si kundërshtarët e tjerë që rrinë vetëm mbrapa. Teuta ka treguar gjatë gjithë këtij sezoni që përballë ekipeve të forta ka zhvilluar lojë pozitive dhe ka marrë rezultate pozitive.”

Në kampionat ekipi i Bledi Shkëmbit ka bërë një sezon pozitiv, ndërsa renditet në vend të tretë, por në Durrës presin më shumë.

Ditmar Bicaj: Urojmë që ti bëjmë një dhuratë tifozëve dhe dy presidentëve duke sjellë trofeun në Durrës.

Reparti i avancuar nuk ka qenë efikas në ndeshjet e fundit, por Bicaj ka besim se ndaj Kukësit sulmuesit do ta dërgojnë topin në rrjetë.

Kukësi-Teuta luhet sot në orën 17:00 në stadiumin Elbasan Arena.