M.City vuan ndaj Sheffield, por fiton me golat e Haaland dhe Rodri (VIDEO)

Manchester City mori një fitore të vuajtur 2-1 ndaj Sheffield United, në sfidën e vlefshme për javën e tretë të Premier League.  Nuk ishte një ndeshje e lehtë për Cityn që në mungesë të trajnerit Pep Guardiola, drejtohej nga ndihmësi i spanjollit Juan Manuel Lillo.

Julian Alvarez fitoi një penallti dhe në minutën e 37-të.  Erling Haaland  e mori përsipër, por do ta humbiste. Këmbëngulja e “Qytetarëve” u shpërblye në minutën e 63-të. Këtë herë, Haaland nuk fali dhe pas një harkimi të Jack Grealish shënoi me kokë. Ky ishte goli i tretë për 23-vjeçarin në këtë fillim të sezonit.

Megjithatë, vendasit nuk u dorëzuan dhe barazuan në të 85-tën me Bogle. Gjithsesi, City pas tre minutash u rikthye në avantazh me anë të Rodri që nuk fali me një goditje të fortë nga brenda zonës.