Memushaj: Kundër Italisë isha gati për të kënduar të dyja himnet, bëj tifo për … (VIDEO)

Ledian Memushaj ka emigruar në Itali në vitin 1997. Mesfushori i kombëtares sonë duket se i ka realizuar ëndrrat e tij. Ai është rritur në qytetin e Peskarës dhe arriti të luante me shiritin e kapitenit në krah për këtë ekip, në Seria A. Vlonjati kaloi një vit te Benevento por u kthye përsëri te Pescara.

Në një intervistë të gjatë për “Rete8” ai tregon momentin kur ky ekip u ngjit në Seria A. “Natën kur siguruam kalimin në Seria A, isha në grumbullim me kombëtaren në veri të Francës. Një vend i humbur dhe nuk punonte mirë as interneti. Ndeshjen e lexoja me tekst dhe po vija vërdallë në dhomë si i çmendur. Në fund u lumturova shumë, madje po e pranoj, më shpëtoi edhe një pikë loti” shprehet Memushaj.

Ai tregon edhe për sfidën me Italinë kundër Shqipërisë. “Të ishte për mua do t’i këndoja të dy himnet në eliminatoret e Botërorit. Të Italisë e këndova në një moment me vete, pasi tashmë e kam mësuar. Jam rritur me golat e Ronaldos së vërtet, ndaj mund të them se bëj tifo ose e thënë më mirë mbështes Interin ”, shtoi 31 vjeçari.