Merr fund “telenovela” Lukaku, sulmuesi belg rikthehet në Seria A

Telenovela e verës që përkon me emrin e sulmuesit belg Romelu Lukaku, i cili përfshiu në vallen e transferimeve dhe akuzave Interin, Juventusin, Chelsea-n dhe Ligën Arabe, do të marrë fund nesër.

Konfirmimin për këtë e ka dhënë vetë bomberi teksa foli për mediat nga Belgjika, ku ishte i pranishëm në një turne për të rinjtë

“Nesër do të fluturoj për në Romë për të nënshkruar… Jam nervoz”, tha Lukaku për Het Laaste Nieuës, duke zbuluar marrëveshjen me ujqërit e Mourinhos që përflitej prej ditësh.

Drejtori i përgjithshëm Tiago Pinto dhe zv-Presidenti Ryan Friedkin kanë fluturuar për në Londër në orët e para të pasdites të së premtes dhe në mbrëmje ndoqën në stadiumin Stamford Bridge sfidën Chelsea- Luton.

Operacioni i huazimit me vlerë 8-10 milionë euro (12 milionë euro pagë për Lukakun) ka marrë jetë. Mourinho do të gjejë sërish sulmuesin belg pas përvojës së tij të Manchester United mes viteve 2017 dhe 2018.