Koha po mbaron dhe Milani ka nevojë urgjente t’i vërë në dispozicion trajnerit Massimiliano Allegri një skuadër konkurruese për objektiva madhorë. Strategjia është e qartë: përforcime në çdo repart, duke nisur nga mbrojtja.
Pas dështimit të pistës Akanji, kuqezinjtë kanë zhvendosur vëmendjen nga Premier League, këtë herë drejt Liverpool-it. Objektivi është Joe Gomez, një qendërmbrojtës me përvojë që do të kompletonte repartin defensiv. Kampionët e Anglisë e kanë nxjerrë në merkato pas blerjes së talentit Leoni nga Parma, por presin të mbyllin transferimin e Marc Guehi nga Crystal Palace. Mbrojtësi i lindur në 1997 ka pranuar ofertën e Milanit: 3,5 milionë euro në sezon deri në vitin 2029. Tani pritet përgjigjja e Liverpool-it, që kërkon rreth 17 milionë euro për ta lënë të lirë.
Në mesfushë, emri më i nxehtë mbetet Adrien Rabiot. Mesfushori francez, aktualisht në situatë të vështirë te Marseille, po negociohet nga e ëma-agjente, Veronique, e cila vazhdon bisedimet me drejtuesit kuqezinj. Siç raporton eksperti i merkatos Orazio Accomando, Milani ka gati një kontratë deri në vitin 2028 me pagë 5 milionë euro plus bonuse. Klubi francez vazhdon të kërkojë 15 milionë euro për kartonin e tij, dhe të dyja palët kanë vetëm pak orë kohë për të gjetur një marrëveshje.
Sa i përket repartit ofensiv, Santiago Gimenez do të qëndrojë, por Milani nuk heq dorë nga alternativa Artem Dovbyk. Sulmuesi ukrainas nuk është më pjesë e planeve të Gasperinit, ndërsa kuqezinjtë kërkojnë një qendërsulmues fizik për ta alternuar. Nuk pritet një shkëmbim mes klubeve, por negociatat për një huazim me të drejtë blerjeje janë në vazhdim.