Moggi: Futbolli italian në krizë, e dëshmon dhe fakti që Ronaldo shihet si Zot

Luciano Moggi, ish-drejtori sportiv i Juventusit, ka folur për “RMC Sport” në lidhje me transferimin e Cristiano Ronaldos, momentit që po kalon futbolli italian si dhe gjendjes në kombëtare axurre.

“Futbolli italian kohët e fundit është në krizë dhe këtë e tregon shumë mirë transferimi i Ronaldos. Ai erdhi në Itali dhe këtu po pritet si të ishte Zot. Kjo ndodh sepse në Italia nuk ka lojtarë që mund të quhen fenomen. Ai mund të shënojë 15-20 gola në Itali, por nuk më pëlqen mënyra se si po reagohet në lidhje me golin e parë që mund të shënohet. I duhet të përshtatet edhe pse është kampion. Do t’i duhet kohë.

Mancini? Ajo që thotë ai është e drejtë, po duhet ta kishte menduar diçka të tillë që kur ishte trajner i Interit, kur i linte italianët jashtë, atyre iu mungojnë edhe mundësitë. Sa i përket shiritit të kapitenit, mendoj se është një çështje dytësore pasi në këto momente, ka gjëra më të rëndësishme që duhen rregulluar. Revolucioni duhet të nisë nga shkollat e futbollit, të mendohet më pak për taktikën dhe më shumë për teknikën individuale”, deklaroi Moggi.