Ndeshja Izrael-Shqipëri do të gjykohet nga patriotët e Panuccit

Kombëtarja jonë do të luajë nesër ndeshjen e tretë në Ligën C ndaj Izraelit. Sfida e fundit është luajtur në “Elbasan Arena” më 7 shtator të këtij viti dhe ka përfunduar me fitoren minimale të të besuarve të Christian Panuccit.

Ditën e sotme, UEFA, ka zbuluar edhe emrat e gjyqtarëve, që do të bëjnë drejtësi në ballafaqimin e së dielës mbrëma. Kryesor do të jetë një emër i njohur i Seria A, Paolo Mazzoleni.

Ai do të ndihmohet nga asistentët Fabiano Preti dhe Matteo Passeri. Gjyqtarë ndihmës shtesë do të jenë Davide Massa dhe Piero Giacomelli. Të shohim nëse italianët do t’i sjellin fat bashkatdhetarit të tyre, Panucci.