Pakult: Duhet të kishim shënuar golin e sigurisë!

Trajneri i Kukësit, Peter Pakult është shprehur i lumtur për kualifikimin e skuadrës verilindore për në gjysmëfinale të Kupës së Shqipërisë. Strategu austriak ka theksuar se skuadra e tij duhet ta kishte mbyllur ndeshjen shpejt.

“Ia vështirësuam vetes ndeshjen, sepse që në pjesën e parë duhej të shënonim golin e dytë e të sigurisë. I kishim të gjitha mundësitë për këtë. Rezultati 1-0 deshi që të luftonim deri në fund, sepse e donim kualifikimin me çdo kusht. Tirana është një ekip shumë i mirë. E filluam ndeshjen me tre mesfushorë, për të penguar që në nisje lojën e kundërshtarit. E vetmja gjë që na mungon është qetësia.

Për këtë duhet të bëjmë stërvitje dhe vetëm stërvitje. Edhe ndaj Kamzës nuk arritëm të shënojmë të parët. Ekipi duhet t’i shfrytëzojë rastet më mirë. Duhet të jemi më të koncentruar para portës. Duhej goli i dytë, që do të na jepte më shumë qetësi sot. Kemi mundësi të vazhdojmë akoma në ndeshjet e Kupës”.