Panucci: Ndeshje e jashtëzakonshme e djemve, në golin e parë ishim në gjumë

Trajneri i kombëtares sonë, Christian Panucci është shprehur shumë i kënaqur, por sipas tij djemtë u ndëshkuan nga një gabim i rëndë.

“Më vjen shumë keq për djemtë, se kanë bërë një ndeshje të jashtëzakonshme, kemi bërë lojë. Kemi pësuar gol me një rivënie të portierit dhe kjo është shumë e rëndë. Ndërsa të dytin e kemi pësuar me një autogol, por të kthehesh në shtëpi me një 0-2 të luajtur kështu të bën të ndjehesh shumë keq.

Goli i parë? Unë u ktheva, pashë topin që po shkonte te Hemed dhe pastaj pashë përsëritjen. Kemi fjetur, thjesht kemi fjetur.

Është e vështirë tani se duhet të fitosh 3-0 dhe të shpresosh që Skocia të mundë Izraelin, pastaj me pikë jemi të barabarta do të ishim me golavarazh keq. Jemi jashtë, nuk jam dorëzuar, por bëhet e vështirë. Është mëkat, se kemi bërë një ndeshje me shumë cilësi.

Nuk më pëlqen që thoni emra, ishte një skuadër e madhe që ka bërë një ndeshje të madhe dhe nuk më pëlqen të përmend emra”, tha Panucci.