Panucci përgatit një surprizë të madhe, ja formacioni që pritet të sfidojë Izraelin

Nuk ka më eksperimente, tashmë Panucci do të hedhë 11-shen më të mirë në fushë në duelin vendimtar ndaj Izraelit. Trajneri i kuqezinjve pritet të rreshtojë në fushë gardën e vjetër, duke besuar te eksperienca e tyre në ndeshje të rëndësishme.

Surpriza nuk do të mungojnë në rreshtimin titullar përballë izraelitëve, me Myrto Uzunin, që pasi luajti në pjesën e dytë kundër Jordanisë, këtë herë pritet t’i besohet një fanellë titullari. Rreshtimi i trajnerit Italian pritet të jetë 4-3-3, me Strakoshën që rikthehet titullar mes dy shtyllave, pasi në miqësoren me Jordaninë u aktivizua Berisha, në qendër do të luajnë Mavraj dhe Gjimshiti, ndërsa Hysaj është i sigurt në të djathtë.

Në të majtë ka një balotazh të vogël mes Binakut dhe Lenjanit, me të parin që është më i favorizuar, ndërkohë që në mesfushën me 3 do të luajnë Xhaka, Basha dhe Memushaj.

Në sulm, Grezda, që pati shqetësime fizike, ka rikuperuar dhe pritet të luajë i hapur nga e majta, ndërsa në krahun e djathtë me shumë mundësi do të aktivizohet Uzuni, që goditi dhe shtyllën përballë Jordanisë. Në majën e sulmit rikthehet titullar, Bekim Balaj që do të ketë peshën kryesore për të dërguar topin në rrjetë.