Partizani përgatit këtë fundjavë festën e titullit, do i dorëzohet kupa

Titulli kampion i Kategorisë Superiore për sezonin 2018-2019 dorëzohet këtë të diel. Në “Selman Stërmasi” luhet Partizani-Kukësi, sfida e fundit në shtëpi për të kuqtë, kështu që Federata Shqiptare e Futbollit ka vendosur që trofeun t’ua dorëzojnë kampionëve të rinj pikërisht para mbështetësve të tyre, që kanë pritur plot 26 vite për të përjetuar emocionet e një suksesi të tillë.

Edhe në kampionatet me prestigjioze të botës tashmë është bërë traditë që Kupa të dorëzohet nga organizatorët e garës në ndeshjen e fundit shtëpiake, sigurisht nëse matematika i ka dhënë verdiktet e saj.

Festa do të vijojë e jashtëzakonshme edhe për disa orë më pas. Drejtuesit e Partizanit prej disa javësh po punojnë që organizimi të jetë perfekt, me surpriza të mëdha, për të qenë në lartësinë e duhur për një titull të pritur prej shumë kohësh.