Presidenti i Genoas shkarkon trajnerin pas një humbje, emëron Juric

Presidenti i Genoa, Enrico Preziosi nuk fal. Ka mjaftuar një humbje në shtëpi ndaj Parmës me shifrat 1-3 që presidenti i klubit kuqeblu të marrë vendimin drastik për të shkarkuar trajnerin Davide Ballardini.

Një shkarkim aspak i drejtë ky duke patur parasysh faktin që Genoa e ka nisur mirë kampionatin duke grumbulluar 12 pikë pas 7 javësh po aq sa Milani dhe pikërisht ndaj kuqezinjëve ka për të luajtur ndeshjen e prapambetur të javës së parë, pa harruar këtu që ka vënë në evidencë si Piatek dhe meritat që polaku ka shënuar 9 gola në 7 ndeshje të kampionatit, 13 përfshirë edhe ata 4 ndaj Lecces në Kupën e Italisë, shkojnë edhe për trajnerin Ballardini.

Në vend të 54-vjeçarit, Preziosi ka emëruar në krye të skuadrës kroatin Ivan Juric. 43-vjeçari rikthehet te Genoa pasi është shkarkuar dy herë nga numri 1 i kuqebluve për herë të fundit në nëntor të 2017-ës. Genoan e presin ndeshje delikate ndaj Juves, Udineses, Interit, Napolit dhe pastaj vjen derbi ndaj Sampdorias.