Shoku i CR7 sulmon Modric: S’duhej të ishte as mes 3 finalistëve të “Topit të Artë”

Luka Modric ishte fitues i të gjitha çmimeve individuale në vitin 2018, duke fituar garën me Cristiano Ronaldon dhe Lionel Messin. Ai u vlerësua si futbollisti më i mirë nga UEFA, FIFA dhe nga “Topi i Artë”. Një nga shokët e ekipit te Portugalia, Luis Nani mendon ndryshe për vlerësimet.

“Modric është një futbollist shumë i mirë në rolin e tij. Por, në të vërtetë, nuk e meritonte ta fitonte “Topin e Artë” para Ronaldos, Messit, Neymar e ndonjë tjetri. Ronaldo do të kishte qenë fituesi i drejtë i këtij çmimi për vitin 2018. Duhet të biem të gjithë dakord se lojtarët më të mirë në botë janë ata, që vendosin fatin e ndeshjeve në mënyrë individuale, që bëjnë ndryshimin në klubet e tyre.

Kjo është ajo që ka ndodhur me Ronaldon, i cili ishte deri në verë në të njëjtin ekip me Modric. Vetëm në korrik u transferua te Juventusi dhe ende vazhdon të thyejë rekorde.

Pozicioni dhe forca konkurruese e Ronaldos, si fizike, ashtu edhe mendore, është e paarritshme nga askush. Ai është konkurruesi më i madh, përveç në PlayStation, lojë të cilën nuk di ta luajë”, deklaroi Luis Nani.