Shqipëria U19 fiton ndaj Maqedonisë së Veriut, por nuk arrin të kualifikohet

Shqipëria U19 i mbyll me fitore kualifikueset për Euro 2023 duke mundur 3-1 Maqedoninë e Veriut U19. Ky sukses ndërkohë nuk i mjafton ekipit të Cungut për t’u kualifikuar në raundin pasardhës duke qenë se skuadra u rendit në vendin e tretë me katër pikë të grumbulluara, pas Francës kryesuese dhe Serbisë.

Kuqezinjtë e nisin mirë teksa në minutën e 19-të, Mata kalon Shqipërinë në avantazh falë ekzekutimit të saktë nga pika e bardhë. Kur u duk se pjesa e parë do të mbyllej me rezultatin 1-0, miqtë befasojnë duke realizuar golin e barazimit. Në fraksionin e dytë, kuqezinjtë realizuan dy gola të menjëhershëm me Pjeshkën dhe Bibon dhe më pas administruan mjaft mirë rezultatin.