Sindikata e Futbollistëve reagon për episodin e dhunës së Nwabueze ndaj Bylis

Ndeshja mes Bylisit dhe Laçit solli një episod të pazakontë dhune. Kyrian Nwabueze i Laçit, nuk mbajti nervat pasi gjyqtari e ndëshkoi me karton të kuq dhe para se të dilte nga fusha, shkoi dhe provokoi lojtarët ballshiotë që reaguan.

Në atë moment, mes nigerianit me pasaportë amerikane dhe Carkanjit e lojtarëve të tjerë Bylis nisi një sherr i madh, teksa e pësoi edhe zëvendës-trajneri ballshiot, Bekim Kuli, i cili nga rrëmuja përfundoi i gjakosur.

Rreth këtij akti të turpshëm, ditën e sotme ka reaguar Sindikata e Futbollistëve Profesionistë. Sindikata shprehet në mbështetje të plotë të Komisionit të Disiplinës që do të marrë masat për ata që u përfshinë në sherr, ndërsa në reagimin e tyre bëjnë edhe ftesë për bashkëpunim me FSHF-në, Ligën, Shoqatë të Tifozëve dhe Medias që ngjarje të tilla të mos përsëriten.