Skënderbeu thyen Kukësin, Gripshi i jep 3 pikë korçarëve (VIDEO)

Skënderbeu ruan hapin e Partizanit, duke fituar minimalisht 1-0 ndeshjen kryesore të javës së 7-të ndaj Kukësit. Në Korçë, skuadra e drejtuar nga trajneri Orges Shehi ishte dominuese.

Në minutën e 17-të, Gripshi realizoi golin e avantazhit. Pas një harkimi nga e djathta të Bregut, sulmuesi goditi me kokë mjaft mirë brenda zonës. Në minutën e 30-të, korçarët kishin një mundësi të artë për të shënuar golin e dytë me penallti, por Muzaka nuk u tregua i saktë nga pika e bardhë duke e çuar topin jashtë kuadratit.

Në pjesën e dytë, Kukësi tentoi që të gjente golin e barazimit, por vendasit u mbrojtën mirë. Me këtë fitore Skënderbeu ngjitet në vendin e dytë me 14 pikë, dy më pak se Partizani kryesues. /Koha Jone/