Sonte rikthehen emocionet e Championsit, ja duelet më interesante

Sonte në mbrëmje do të rikthehen emocionet e Ligës së Kampionëve, teksa do të ketë duele interesante. Manchester United pret në “Old Trafford” skuadrën e Valencias, një ndeshje delikate për “Djajtë e Kuq” që po vuajnë shumë në kampionat në javët e fundit, ku kanë marrë një barazim e 1 humbje.

Bayerni i Mynihut do të presë Ajaxit në ndeshjen e tij të dytë të Grupit E. Të dyja këto ekipe vijnë pas fitoreve në ndeshjet e tyre të para kundër Benficas dhe AEK-ut. Reali i Madridit do të luajë në Rusi ndaj CSKA të Moskës. Skuadra kampione e Evropës nuk ka shfaqur një formë shumë të mirë në 2 ndeshjet e fundit në kampionatin spanjoll dhe ndaj moskovitëve do të kërkojë që të rigjejë shkëlqimin e humbur në La Liga.

Sot do të zbresin në fushën e lojës edhe Juventusi e Manchester City. Zonja e Vjetër do të luajë kundër Young Boys, por pa Cristiano Ronaldon të skualifikuar. Bardhezinjtë në sfidën me zviceranët do të kërkojnë që të vijojnë serinë e fitoreve për ta çuar atë në 9 radhazi në këtë fillim sezoni. Ndërsa Manchester City do të luajë ndaj Hoffenheimit në Gjermani.