Spalletti: Icardi dhe Lautero? Meritojnë të luajnë që të dy

Luciano Spalletti doli në konferencën e zakonshme për shtyp në prag të ndeshjes me Romën, që do të luhet mbrëmjen e të shtunës në “San Siro”. Ky do të jetë shansi i radhës për zikaltrit, që nëse arrijnë të triumfojnë ndaj verdhekuqve, atëherë mund të ecin të qetë drejt arritjes së objektivit, që është një vend në zonën Champions.

“Të luash me Romën për këtë objektiv, në 6 javët e fundit, do të thotë që jemi përmirësuar ndjeshëm, pasi verdhekuqtë kanë disa vite që rrinë në majat e renditjes. E dimë rëndësinë e sfidës dhe do të kërkojmë maksimumin, për të fituar qetësinë e nevojshme, për javët e fundit të kampionatit.

Icardi dhe Martinez janë që të dy sulmues shumë të mirë, që meritojnë të luajnë nga fillimi, ndaj jam në dilemë. Besoj se këtë vendim do ta marr pak para ndeshjes, por kushdo që të luajë, jam i bindur se do të bëjë mirë.

Thashethemet? Nuk dua të flas për Dezekon, pasi kam në skuadër dy sulmues shumë të mirë, si Icardi dhe Lautaro. Sa u përket dëmtimeve, Borja është mirë, ndërsa për Brozoviç do të bëjmë sot vlerësimet”, tha Luciano Spalletti.