Tare: Kampionati i falsifikuar, VAR na ka “ngrënë” 12 pikë

Igli Tare ka zgjedhur që të ngrejë zërin për venimet e arbitrave në Itali. Drejtori Sportiv I klubit të Lacios ka dhënë sot një intervistë për gazetën “Corriere dello Sport”, teksa nuk e ka fshehur mërzinë ndaj vendimeve të teknologjinë gjatë këtij sezoni. Shembulli më i fundit është ndeshja kundër Kaljarit, ku nuk u vendos të aplikohej VAR për një faull ndaj Imobiles, ndërsa një gjë e tillë u bë në favor të Kaljarit.

“Pse ekzistojnë dy interpretime të ndryshme? Ajo ndaj Imobiles nuk është penalltia e zakonshme. Është një penallti e dyfishtë dhe nuk ndodh thuajse asnjëherë në futboll. E prek fillimisht një lojtar i Kaljarit dhe pastaj tjetri. E kanë rrëzuar dy vetë. Nuk e di se si nuk e kanë pare.

VAR-i na ka hequr shumë në klasifikim. Unë them minimumi 12 pikë. A të themi 6? Mirë, le të themi se kemi humbur 6 pikë për shkak të interpretimit të gabuar dhe gabimesh të treguara në TV, si goli me dorë i Kutrones gjatë ndeshjes me Milanin. Pozicioni i Lacios në klasifikim sot do të ishte i ndryshëm, nuk them me siguri të kualifikuar në Champions, por thuajse. Kështu po trukohet kampionati”, ishte akuza e rëndë e Tares.

“E kam thënë dy apo tre muaj më parë. Mes nëntorit dhe dhjetorit jemi penalizuar në mënyrë të dukshme. Katër ndeshje, njëra pas tjetrës, në të cilat Lacio u dëmtua dhe kemi humbur kontaktin me kreun, ndaj Napolit dhe Juves. Ishim 3 pikë larg vendit të parë, flitej për titull. U ngadalësuam, tani jemi të katërtit, në garë me të tjerët. Por ka pasur një handikap për ne. Kampionati, e them me qartësi, është plotësisht i manipuluar. Dhe nuk ka mirëbesim në vendime”, ka thënë drejtori shqiptar.