Teuta shokon Skënderbeun në Korçë, Shkëmbi mund Shehin me 10 lojtarë (VIDEO)

Skënderbeu dhe Teuta kanë dhuruar një ndeshje spektakolare, por skuadra durrsake ka arritur që të rrëmbejë 3 pikë falë një sukesi minimal 0-1. Bledi Shkëmbi ka arritur që të triumfojë  ndaj Orges Shehit në përballjen e dytë mes tyre.

Durrsakët e nisën mjaft mirë takimin dhe iu afruan disa herë rrezikshëm portës së mbrojtur nga Teqja, ndërsa në minutën e 30-të arritën të gjejnë edhe golin, me anë të sulmuesit të krahut, Sekou Kamara, që shënoi me kokë, pas një rrëmuje në zonë. Goli i Teutës zgjoi të besuarit e Shehit, që u hodhën në sulm, në kërkim të barazimit, ndërsa në minutat shtesë të pjesës së parë fituan një 11-metërsh me anë të mesfushorit Gjergji Muzaka, i cili pësoi një ndërhyrje nga prapa, nga mesfushori Beqja.

Ky i fundit u ndëshkua edhe me kartonin e dytë të verdhë, duke lënë durrsakët me 10 futbollistë, ndërsa penalltinë çuditërisht e mori përsipër mbrojtësi i Kosovës Fidan Aliti, i cili gjuajti lehtë dhe në qendër, duke ia dorëzuar topin portierit Isli Hidi.

Pjesa e dytë u luajt vetëm në gjysmëfushën e Teutës, me Skënderbeun që krijoi një mori rastesh për të barazuar, por herë për shkak të pasaktësisë së sulmuesve korçarë, herë për meritë të Hidit e herë për mungesë të fatit, topi nuk përfundoi në rrjetë.

Teuta pas kësaj fitoreje ngjitet në vendin e tretë me 28 pikë, ndërsa lë Skënderbeun në vendin e dytë, por me 4 pikë më pak se skuadra e Partizanit.