Tirana mposht Partizanin, ja si ndryshon renditja pas javës së 6-të në Superiore

Java e gjashtë e Abissnet Superiore solli ndryshime në renditje, me Tiranën që triumfoi 3-1 në derbin ndaj Partizanit, ndërsa Teuta mori kreun e kampionatit. Egnatia dhe Vllaznia siguruan gjithashtu fitore të rëndësishme.

Tirana festoi në derbin e kryeqytetit, duke mposhtur Partizanin me rezultatin 3-1. Xhixha kaloi bardheblutë në avantazh në minutën e 7-të, ndërsa Himallari barazoi për të kuqtë në minutën e 36-të. Në pjesën e dytë, Ilievski dhe Kish nga pika e bardhë vulosën fitoren e Tiranës. Pas këtij rezultati, Partizani mbetet me vetëm 4 pikë.

Kryesimin e renditjes e mban Teuta, që mposhti Skënderbeun 2-0 falë golave të Kallakut dhe Martelos. Durrsakët shkojnë në kuotën e 16 pikëve, ndërsa Egnatia renditet e dyta me 15 pikë, pas fitores 2-0 në transfertën ndaj Laçit.

Edhe Vllaznia mori tri pikët, duke mundur Dinamo City 1-0 me golin e Muratajt. Ndërkohë, AF Elbasani dhe Vora ndanë pikët pas barazimit 1-1.

Pas gjashtë javësh, Teuta kryeson me 16 pikë, e ndjekur nga Egnatia me 15 dhe Dinamo City me 12 pikë. Në fund të renditjes ndodhet Skënderbeu me vetëm 3 pikë, ndërsa Tirana kërkon të përfitojë nga triumfi në derbi për të ngjitur pozitat në vazhdim të kampionatit.