Trajneri i Turqisë: Grup i balancuar, problem do të kemi Andorën

Trajneri i përfaqësueses së Turqisë, Mircea Lucescu e ka cilësuar si të balancuar grupin e kualifikueseve të Euro 2020, ku mes kundërshtarëve ka edhe Shqipërinë. Në prononcimin e tij të parë, trajneri i Turqisë, deklaroi se duhej shumë kujdes ndaj çdokujt.

“Të gjithë grupet janë të barabarta. Ky nuk është një grup i lehtë. Ne do të luajmë për të fituar të gjithë ndeshjet tona. Franca është një skuadër e fortë. Ne shpresojmë që skuadra jonë e re të fillojë të tregojë paraqitje më të mira. Ata kanë filluar të luajnë në skuadrat e tyre. Është e vështirë përndryshe për ne të luajmë si një skuadër dhe na duhet të luajmë shumë mirë në këtë grup.

Andora ka një stadium të vogël dhe shpesh ndodh që krijohet trysni në stadiume kaq të vogla. Unë do të dëshiroja që të merrja lojtarë të rinj nga ekipet e të rinjve, në vend që të ftoj lojtarët me eksperiencë që të kthehen përsëri në ekipin kombëtar”, deklaroi Lucescu.