Trashi replikon me Ze Marian: Nuk e di se çfarë ndeshjen pa ai, ta rishohë sërish

Një ndër më të mirët në fushën e lojës për Partizanin, Trashi ka folur pas fitores ndaj Tiranës. “Më kishte munguar shumë derbi, aq më shumë kjo atmosferë e krijuar në stadium. Jemi munduar gjatë të gjithë javës të jepnim maksimumin dhe të ishim të përqendruar, për derbin ndaj Tiranës. Këtë herë ishim vetëm katër futbollistë që e kishim luajtur më parë derbin, ndaj u angazhuam edhe në të shpjeguarit për futbollistët e tjera. Nuk mendoj se Tirana ishte shumë dobët, por ne bëmë maksimumin për ta vënë në vështirësi.

Mendoj se trajner Gega po bën një punë shumë të mirë, duke u munduar të mbajë skuadrën me këmbë në tokë. Pastaj ai mundohet të mbajë raporte shumë të mira me futbollistët edhe jashtë fushës. Mbase është i ndikuar edhe nga fakti që ka jetuar dhe punuar jashtë. Jam sakrifikuar shumë për të qenë pjesë e derbit. Në dy ditët e fundit nuk kam qenë mirë dhe u dëshmua edhe nga rezultati i vizitave. Nuk di se çfarë ka parë Ze Maria, por duhet ta shohë sërish ndeshjen me skuadrën e tij dhe të vlerësojë se kush ka patur një rast të vetëm”, deklaroi Trashi.