Trukoi ndeshje në Spanjë, mesfushori i Junajtid rrezikon 4 vite burg

Mesfushori i Mançester Junajtid, Ander Herrera rrezikon që të shkojë në burg, pasi dyshohet se ka trukuar ndeshje në La Liga.

Prokurorët spanjollë kanë kërkuar që futbollisti të dënohet me 4 vite burg, teksa sipas mediave spanjolle ky vendim nuk mund të pezullohet. Lojtari i “Djajve të kuq” akuzohet se në maj të vitit 2011 trukoi një ndeshje, në takimin midis Zaragoza-s dhe Levante-s.

Gjithashtu mesfushori mund të dënohet që të mos luajë futboll për 6 vite. Nën hetim për këtë skandal janë edhe 35 persona të tjerë. Lojtarëve që dënohen për korrupsion në sport me 2 vite heqje lirie u pezullohet dënimi kur e kanë për herë të parë, por shtimi i pretencës nga prokurorët do ja bëjë edhe më të vështirë mbrojtjes futbollistit të Junajtid.