U rikthye nga Korea e Jugut, ylli i Tottenham vetizolohet në karantinë

Koreja e Jugut është vendi i dytë në botë, pas Kinës, me numrin më të lartë të personave të prekur nga coronavirusi, me mbi 2300 raste dhe 16 të vdekur. Kjo situatë në vendin e tij të lindjes, ka detyruar yllin e Tottenham Son Heung-min të futet në vetëkarantinë pas një udhëtimi në Korenë e Jugut.

Në fillim të shkurtit, Son udhëtoi në Korenë e Jugut për të kryer një operacion në krah, pasi e theu atë në ndeshjen ndaj Aston Villa-s, pasi dëshironte që operacioni të kryhej nga një njëjti kirurg që e kishte operuar edhe para 3 vitesh.

Megjithatë, edhe pse gjithçka ka kaluar tashmë për futbollistin, ai do të qëndrojë i izoluar për 14 ditë, pasi frika nga coronavirusi është e madhe. Ndërkohë, futbolli është prekur drejtpërdrejt nga coronavirusi. Një ditë më parë, në Itali u regjistrua rasti i parë i një futbollisti të prekur nga virusi i ri, COVID-19.

Ndonëse identiteti i sportistit nuk është bërë publik, dihet që ai luan në Serie C, kategoria e tretë italiane, në provincën e Sienës. Futbollisti kishte temperaturë përpara ndeshjes dhe u fut me vullnet të lirë në karantinë. Pas vizitave ai rezultoi pozitiv me koronavirus, ndërsa gjendja e tij shëndetësore është përmirësuar.