Varane: Dhashë gjithçka te Reali, United skuadër me shumë potencial!

Raphael Varane ishte një nga largimet e bujshme të Realit të Madridit në merkaton e kësaj vere. Pas Sergio Ramos edhe qendërmbrojtësi francez vendosi të braktisë “anijen” merengues duke u transferuar te Manchester United për shifrën e 40 milionë eurove.

“Nuk ishte një vendim i marrë nga një ditë në tjetrën. Më është dashur të mendohem mirë. Doja të largohesha në mënyrën më të mirë nga Los Blancos. Te Reali kam dhënë gjithçka dhe për këtë arsye kërkoja një sfidë të re, emocione të tjera, për këtë arsye zgjodha të isha pjesë e një kampionati fantastik si Premier League.

Këtu klubet ashtu si në Madrid presin shumë nga afrimet e reja dhe presioni është maksimal. Ashtu si edhe te Reali edhe te Manchester United duan të fitojnë gjithmonë dhe dy rezultatet e tjera si barazimi, ashtu edhe humbja konsiderohen rezultate negative. Në skuadër kemi talent por edhe eksperiencë. Jemi të bindur se do të bëjmë mirë. Duhet të besojmë në potencialin tonë, dhe të jemi ambiciozë”, deklaroi fillimisht Varane.