Xhaka dhe Shaqiri kërkojnë falje për shqiponjën dykrenare ndaj Serbisë

Në hotelin Nati të Feusisberg, ku është grumbulluar kombëtarja e Zvicrës për sfidat e radhës në Ligën e Kombeve është mbajtur një konferencë për shtyp me trajnerin Vladimir Petkoviç. E gjithë skuadra ishte e pranishme në sallë sipas portalit “Blick.ch” me qëllimin për të qenë sa më transparent.

Në dy anët e trajnerit Petkoviç dhe zyrtarit të federatës, Claudio Sulser, ishin rreshtuar Stephan Lichtsteiner, Granit Xhaka, Yann Sommer, Xherdan Shaqiri dhe Johan Djourou. Futbollistët me origjinë shqiptare dhe kapiteni kanë kërkuar falje për “shqiponjën” me dy kokë, që e bënë në finalet e Botërorit të Rusisë, në fitoren ndaj Serbisë.

“Do të isha budalla, nëse do ta bëja përsëri. Nuk do të ndodhë më”, deklaroi Granit Xhaka. Stephan Lichtsteiner ndërkohë u shpreh: “Kërkoj falje, nuk dua t’i hap probleme askujt”. Xhderdan Shaqiri ndërkohë ishte disi më ironik:“Sigurisht, kërkoj falje, nëse njerëzit ndihen të sulmuar, duke parë ndeshjen nëpër male…”.