Zurich falënderon futbollistin shqiptar që ra në një gropë tre metra të thellë (VIDEO)

Zurich-u e nisi me fitore aventurën në Ligën e Evropës, duke mundur në transfertë AEK Lamanca-n, por në Zvicër më shumë po diskutohet për Benjamin Kolollin, heroin e skuadrës që shënoi golin e fitores. Mesfushori i përfaqësueses së Kosovës është bërë mjaft i famshëm anembanë botës, sepse pasi shënoi golin, vrapoi drejt tifozëve për të festuar me ta, por në momentin që u hodh të kalonte një tabelë, ra në një gropë të thellë 3 metra.

Vetë Kololli sqaroi incidentin: “Vetëm pasi kisha kërcyer e pashë gropën, ishte ndoshta tri metra e thellë. Shokët e ekipit u desh që të më ndihmonin për të dalë nga gropa, por fatmirësisht gjithçka është në rregull.”, kujtoi Kololli. Trajneri i skuadrës zvicerane Ludovic Magnin u ndal tek incidenti, duke i befasuar të gjithë me përgjigjen e tij.

“Nuk e kam parë në momentin që ra pasi isha duke u marrë me disa gjëra tjera në atë moment. Por ne duhet ta falënderojmë Benjamimin. Kërcimi i tij me siguri do të na sjellë mbi katër milionë klikime në YouTube”, bëri shaka ai. E sigurt është që tani si Kololli, ashtu edhe FC Zurich janë bërë mjaft popullorë.