Berisha: Po shtohen vdekjet. Rama fsheh të dhënat e autoriteteve kineze që ndalojnë vaksinën për moshat mbi 60 vjeç

Ish-kryeministri Sali Berisha shprehet se qeveria “Rama” po mban të fshehta për opinionin publik të dhënat e autoriteteve kineze mbi efektet e vaksinës Sinovac, e cila po përdoret këto ditë masivisht në Shqipëri. Në një postim në faqen e tij në Facebook, Berisha deklaron se ditët e fundit është rritur numri i vdekjeve, pas bërjes së vaksinës kineze. Berisha shkruan se duhet ndaluar vaksinimi i moshave mbi 60 vjeç me vaksinën kineze, ashtu siç edhe ka kërkuar vetë qeveria e Kinës. “Edvini fsheh njoftimin e autoriteteve kineze sipas të cilit ndalohet përdorimi i vaksinës në personat mbi 60 vjeç”,- shprehet Berisha në një postim në Facebook.

Reagimi i plotë i ish-kryeministrit Sali Berisha në Facebook:

“Stop vaksinës kineze te/mbi 60 vjeçarët! Shtohet ditët e fundit ndjeshëm numri i te vdekurve pas vaksinimit me vaksinën kineze, e cila është e ndaluar të aplikohet mbi moshat 60 vjeç. Edvini fsheh njoftimin e autoriteteve kineze sipas të cilit ndalohet përdorimi i vaksinës në personat mbi 60 vjeç. Fshihet gjithashtu me qellim data e skadencës e të tre vaksinave në përdorim. Të dashur miq, autoritetet kineze kanë njoftuar zyrtarisht qeverinë shqiptare se ndalohet të përdoret vaksina Sinovac në personat me moshë 60 vjeç e sipër.

Por Xhahili i Surrelit dhe Ndrikull Hajnia fshehin në mënyrë kriminale njoftimin zyrtar të autoriteteve kineze dhe vazhdojnë të injektojnë këtë vaksinë mijëra raste të moshës 60 vjeç e sipër, gjë që është shoqëruar këto ditë me shtim të vdekjeve pas vaksinës në këta persona. Përveç kësaj Xhahili i Surrelit dhe Ndrikull Hajnia fshehin në mënyrë po kriminale datën e skadencës së vaksinës kineze, por edhe të AstraZeneka. Shtoj këtu se sipas mediave një sasi e vaksinës së AstraZeneca të marrë nga Beogradi sipas mediave që citojnë kryeministren e Serbisë, skadoi më datën 28 mars. Duke dënuar si te papërgjegjshme kriminale këto qëndrime të Xhahilit te Surrelit dhe Ndrikull Hajnisë, të cilat po kushtojnë jetë të shumta njerëzish kërkoj:

1-Ndërprejen e menjëhershme të përdorimit të vaksinës kineze tek personat 60 vjeç e sipër,

2-Bërjen menjëherë transparente të datës së skadimit të të tre vaksinave që përdoren në Shqipëri.

3-Avokati i Popullit të marrë në shqyrtim urgjentisht të gjithë dokumentacionin e vaksinave që administrohen në Shqipëri dhe t’ia dërgojë për hetim dhe ekspertizë OBSH”.