Konsultim publik për projektbuxhetin me studentë dhe grupet e interesit

Këshilli bashkiak zhvilloi mesditën e sotme konsultimin e projekt-buxhetit të Bashkisë së Tiranës për vitin 2018 me grupet e interesit, qytetarë dhe studentë. Në hapje të këtij takimi, kryetari i Këshillit Bashkiak, z. Aldrin Dalipi, tha se kështu përmbushet përgjegjësia qytetare dhe ligjore e konsultimit të dokumentit më të rëndësishëm që vjen në Këshillin Bashkiak, siç është projektbuxheti.

“Është një moment i rëndësishëm sepse kemi përgjegjësi morale transparencën ndaj opinionit publik. Nga ana e saj, Bashkia e Tiranës e ka mbyllur procesin e konsultimit publik dhe sot mirëpresim nga të gjithë të pranishmit propozime, sugjerime apo edhe ndryshime, të cilat ju i gjykoni që mund t’i bëjnë mirë projektbuxhetit të Bashkisë së Tiranës. Diskutimet me grupet e interesit kanë filluar në këtë mandat që prej vitit 2015, si një detyrim i qeverisjes vendore”, tha Dalipi, teksa shtoi se Këshilli Bashkiak është i hapur për të dëgjuar çdo sugjerim apo përmirësim të buxhetit nga përfaqësues të grupeve të interesit, shoqatave, studentëve etj.

Mbledhja vijoi nën moderimin e kryetares dhe zv. kryetarit të Komisionin të Ekonomisë dhe Financës së Këshillit, Aida Llazani dhe Mateo Spaho, të cilët përfaqësuan pozitën dhe opozitën në Këshillin Bashkiak të Tiranës.

Të pranishmit u njohën në mënyrë të detajuar me zërat në projektbuxhetin e Bashkisë së Tiranës dhe me investimet e rëndësishme të parashikuara në kryeqytet. Projektbuxheti i vitit 2018 pritet të diskutohet në mbledhjen e radhës së Këshillit Bashkiak.