Kolegji i Posaçëm i Apelimit ka lënë në fuqi shkarkimin e ndihmësit ligjor të Gjykatës së Lartë, Saimir Nazifi nga sistemi i drejtësisë, vendim i marrë më herët nga Komisioni i Pavarur i Kualifikimit. Gjatë seancës dëgjimore më herët, KPK vuri në dukje probleme me pasurinë dhe për gjetjet lidhur me një denoncim nga publiku, të ndihmësit ligjor Saimir Nazifi. Komisioni ngriti dyshime për një sërë transaksionesh të kryera nga ndihmësi ligjor i Gjykatës së Lartë, Saimir Nazifi dhe vlerëson se ai ka kryer deklarime të pasakta e të pamjaftueshme në kriterin e pasurisë, të cilat çuan në shkarkimin e tij.
Njoftimi
Trupi gjykues i Kolegjit të Posaçëm të Apelimit, i përbërë nga Ina Rama kryesuese, Albana Shtylla relatore, Natasha Mulaj, Rezarta Schuetz, Sokol Çomo anëtarë, shpalli vendimin për çëàhtjen nr. 35/2024, datë 06.09.2024, që i përket ankimit të subjektit të rivlerësimit Saimir Nazifi kundër vendimit të Komisionit të Pavarur të Kualifikimit nr. 777, datë 25.06.2024.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 777, datë 25.06.2024 të Komisionit të Pavarur të Kualifikimit, që i përket subjektit të rivlerësimit Saimir Nazifi.
Ky vendim është përfundimtar dhe ka efekt të menjëhershëm.
U shpall sot, më datë 18.02.2026, në Tiranë.