Ministrja e Shëndetësisë dhe Mirëqenies Sociale, Klodiana Spahiu theksoi sot rëndësinë e bashkëpunimit ndërinstitucional për garantimin e sigurisë dhe mirëqenies së fëmijëve në shkolla, gjatë prezantimit të Paketës së Sigurisë në Shkolla në Kamëz. Nga aktiviteti i zhvilluar në Kamëz për Paketën e Sigurisë në Shkolla, ku të pranishëm ishin edhe ministri i Punëve të Brendshme, Ervin Demo, ministrja e Arsimit, Mirela Kumbaro, ministri i Bujqësisë dhe Zhvillimit Rural, Andis Salla, ministrja Spahiu tha se dëshira e çdo prindi është që fëmija, kur shkon në shkollë duhet të ndihet i sigurt dhe i qetë, të hyjë në klasë për të bashkëbiseduar me shokët dhe shoqet, të pritet mirë nga mësuesit dhe të jetë larg bullizimit.
”Do doja ta nisja nga dëshira që unë do kisha që fëmija im kur shkon në shkollë të ndihet i sigurt, i qetë, të hyjë në klasë për të pasur një bashkëbisedim me shokët dhe shoqet, për t’u pritur mirë nga gjithë mësuesit dhe për të qenë larg bullizimit”, tha ministrja. Duke folur për rolin e Ministrisë së Shëndetësisë dhe Mirëqenies Sociale në Paketën e Sigurisë në Shkolla, Spahiu tha se kjo nismë ka një rrugëtim që prej vitit 2018 dhe se për të është bërë një punë e përbashkët nga Ministria e Arsimit, Ministria e Brendshme, Ministria e Bujqësisë dhe Zhvillimit Rural dhe institucionet e shëndetësisë dhe mirëqenies sociale.
”Rëndësia e kësaj pakete sot ka një kompleksitet tjetër. Nëse ne si hallka të zinxhirit do funksionojmë siç duhet, ne prindin e lehtësojmë nga ajo pikëpyetje e madhe që ka: A është fëmija im i sigurt në shkollë?”, u shpreh Spahiu. Sipas saj, përgjegjësia institucionale lidhet jo vetëm me sigurinë e fëmijës brenda shkollës, por edhe me territorin përreth saj.
Spahiu u ndal edhe te rëndësia e shëndetit fizik dhe mendor të nxënësve. ”Nëse nuk gëzojmë një shëndet të mirë, nuk mund të jemi në çdo profesion të arrirë. Nëse nuk ka një shëndet mendor të mirë, nuk mund të japim një produktivitet të lartë”, tha ajo. Ministrja Spahiu theksoi se që në momentin e hyrjes në shkollë, fëmijët duhet të jenë të mbrojtur nga një sërë faktorësh që ndikojnë në shëndetin dhe mirëqenien e tyre. Sipas saj, përgjegjësia e Ministrisë së Shëndetësisë dhe Mirëqenies Sociale lidhet edhe me garantimin e kushteve të përshtatshme higjieno-sanitare në shkolla, përfshirë ujin e pijshëm sipas standardeve dhe pastërtinë.