Policia zbardh vdekjen e punonjësit të fabrikës së kromit në Bulqizë, tre persona në pranga

Zbardhen detaje të reja nga ngjarja e ndodhur ditën e enjte në fabrikën e pasurimit të kromit në Bulqizë ku humbi jetën një punonjës 65-vjeçar.

Nga hetimet e kryera ka rezultuar se viktima, me inicialet M. K., i cili ishte punëtor në subjektin Fabrika e Pasurimit të Kromit Bulqizë, ka qenë duke punuar në zonën e grumbullimit të ujrave kulluese të fabrikës, së bashku me shtetasit Rr. K., dhe A . A., të hipur sipër një varke të improvizuar dhe gjatë lëvizjes me të, kanë humbur ekuilibrin duke rënë në ujë.

“Si pasojë shtetasi M. K., ka humbur jetën, dhe pas ngjarjes trupin e viktimës e kanë dërguar në banesë”, tha policia.

Për këtë arsye, blutë kanë bërë arrestimin në flagrancë të Drejtuesit te aktivitetet të Fabrikës së Pasurimit të Kromit dhe dy punëtoret e tjerë që kanë qenë së bashku me viktimën, për veprat penale “Shkelja e rregullave të mbrojtjes në punë” “Moskallzim Krimi” dhe “Veprime që pengojnë zbulimin e së vërtetës”.