Sërish tërmet në Italinë qendrore

Tërmetet që goditën Italinë qendrore, në mesnatën e të mërkurës dhe të enjtes, kanë shkaktuar dëme materiale dhe panik te banorët. Gjate mbrëmjes së të enjtes janë shënuar serish lëkundje me magnitude 4.2 në zonën e Norcias, por pa të plagosur, pasi banorët në zonat, ku pati tërmete të forta vazhdojnë të qëndrojnë jashtë edhe pse kushtet atmosferike nuk janë aspak të favorshme.

Kryetari i bashkisë së qytetit Vissa, një nga qytetet më të mëdha në rajonin e goditur, tha se dëmet më të mëdha janë shënuar në ndërtesat që qenë dëmtuar në tërmetin e 24 gushtit.

Qeveria italiane ka vendosur që të ndajë 40 milionë euro për rajonin e prekur dhe ta vazhdojë gjendjen e jashtëzakonshme të shpallur në gusht në këtë zonë. Qeveria përveç kësaj ka premtuar, që të gjitha ndërtesat e dëmtuara të rindërtohen.