Propozimi i PS për ndryshimin e ndarjes territoriale, që parashikon kalimin e Rinasit, Bërxullës dhe Domjes nën administrimin e Bashkisë Tiranë, ka shkaktuar debate në Këshillin Bashkiak të kryeqytetit.
Këshilltarja e PD-së, Ilda Zhulali, kritikoi mënyrën se si po trajtohet çështja, duke e cilësuar reformën si një vendim me rëndësi kombëtare. “Nuk është një lojë me harta. Kjo reformë ha demokracinë dhe zërin e banorëve”, deklaroi Zhulali, duke kundërshtuar propozimin e qeverisë.
Sekretari i Këshillit Bashkiak, Behar Zeneli, tha se Këshilli nuk po merr një vendim përfundimtar, por vetëm po jep mendimin e tij për propozimin e ardhur nga Kuvendi. “Relacioni është thjesht për mendim. Këshilli do të shprehet nëse është dakord apo jo me marrjen e këtyre tre territoreve”, u shpreh Zeneli.
Këshilltari demokrat Dorjan Teliti kundërshtoi këtë interpretim, duke argumentuar se qëndrimi i Këshillit do të përfshihet në raportin përfundimtar të procesit. “Nuk është thjesht dhënie mendimi. Duam të dimë se si do të reflektohen në vendim si qëndrimi i shumicës, ashtu edhe ai i pakicës”, tha Teliti.
Në përfundim, pritet që Këshilli Bashkiak i Tiranës të miratojë relacionin që do t’i përcillet Kuvendit, së bashku me qëndrimin pro ose kundër propozimit për ndryshimin e kufijve territorialë.