Jetoi në izolim total prej 26 vitesh, humb jetën njeri më i vetmuar në botë

Anëtari i fundit i mbetur i një grupi indigjen të izoluar në Brazil ka ndërruar jetë. Ai jetoi në izolim total për 26 vitet e fundit. Ai njihej si “Njeriu i vrimës” sepse hapte gropa të thella, disa prej të cilave i përdorte për të zënë në kurth kafshët, ndërsa të tjerat duket se ishin hapësira që i përdorte për t’u fshehur.

Trupi i tij u gjet më 23 gusht jashtë kasolles së tij prej kashte, ndërsa nuk kishte kishte shenja dhune. Burri ishte i mbijetuari i fundit i një grupi indigjen, pasi gjashtë anëtarët e tjerë të mbetur të të cilit u vranë në vitin 1995. Grupi jetonte në zonën indigjene Tanaru në shtetin Rondônia, i cili kufizohet me Bolivinë.

Shumica e fisit të tij mendohej se ishte vrarë qysh në vitet 1970 nga fermerët që donin të zgjeronin tokën e tyre. “Njeriu i vrimës” mendohet se ka qenë rreth 60 vjeç dhe ka ndërruar jetë për shkaqe natyrale.