Presidenti i SHBA, Joe Biden infektohet sërish me Covid-19

Presidenti i SHBA-ve, Joe Biden rezultoi përsëri pozitiv për COVID-19. Mjeku i presidentit, Dr. Kevin O’Conner, tha se Biden i ishte rikthyer kolla, ndërsa “temperatura, pulsi, presioni i gjakut, ritmi i frymëmarrjes si dhe sasia e oksigjenit në gjak mbeten krejtësisht normale”.

79-vjeçari u infektua me COVID-19 në fund të korrikut dhe doli nga izolimi të mërkurën e kaluar pasi u trajtua për disa ditë me ilaçin antiviral Paxlovid. Ai u izolua sërish pasi rezultoi përsëri pozitiv të shtunën.

Shumica e pacientëve në rastet e rikthimit të virusit përballen me pasoja të lehta, sipas Qendrave për Kontrollin dhe Parandalimin e Sëmundjeve, dhe nuk ka pasur raporte për komplikime serioze.

Zëdhënësja e Shtëpisë së Bardhë, Karine Jean-Pierre u tha gazetarëve të hënën se presidenti mund të jetë ende duke përjetuar simptoma nga infeksioni i tij i parë me COVID-19, duke theksuar se simptomat zgjasin për pak kohë.